राष्ट्रिय सहकारी महासंघ लि. नेपालका अध्यक्ष केशव बडालले सहकारी पवित्र स्थल भएकाले यसलाई कालो धन लुकाउने माध्यम बनाउन नदिनका लागि सहकारी संघ/संस्थाले सचेत भएर आफ्नो व्यवसायलाई अगाडि बढाउनुपर्ने धारणा राख्नुभएको छ । उहाँले राष्ट्रिय सहकारी महासंघले मिति २०७६ पुस १३ र १४ गते आयोजना गरेको सम्पत्ति शुद्धीकरण निवारण तथा जोखिम विश्लेषण तालिमको समापन समारोहलाई सम्बोधन गर्दै भन्नुभयो, ‘सहकारी समाजिक व्यवसाय भएकाले सामाजिक न्याय र उत्पादन बृद्धिमा सहकारीको शुद्धता र व्यवसायीक कुशलताको आवश्यकता पर्दछ ।’
नेपालमा १२ खर्ब बढी व्यापार घाटा रहेको अवस्थामा समृद्ध मुलुक निमार्णका लागि सहकारीले सम्पत्ति शुद्धीकरण निवारणको सुचक संस्थाका रुपमा सक्रिय भूमिका निर्वाह गर्नुपर्नेमा जोड दिनुभयो । उहाँले सम्पत्ति शुद्धीकरण निवारण ऐन, नियमावली र सहकारी विभागले जारी गरेको सम्पत्ति शुद्धीकरण निवारणसम्बन्धी सहकारी संघ÷संस्थालाई जारी गरिएको निर्देशनको पालना गर्न समेत आग्रह गर्नुभएको थियो ।
समापन कार्यक्रममा सहकारी विभागका उपरजिष्ट्रार शशीकुमार लम्सालले सुचक संस्थाका हिसाबले सहकारीले देशमा सुशासन कायम गराउनका लागि भूमिका खेल्नुपर्नेमा जोड दिनुभयो ।
उहाँले भन्नुभयो,‘सहकारीमा आन्तरिक नियन्त्रण प्रणाली हुन्छ । त्यसलाई बलियो बनाउन सकिएको खण्डमा बाहिरबाट अनुगमन र नियमनको ठूलो आवश्यकता पर्दैन तर सहकारीले सिद्धान्त अनुसार आफूलाई संचालन गर्नुपर्ने हुन्छ ।’ उहाँले सदस्य पहिचान गर्न सहकारीमा सजिलो हुने भएकाले विभागले गरेको निर्देशन अनुसार कार्य गर्न अनुरोध गर्नुभयो ।
महासंघले विगत केहि बर्षदेखि सहकारी संघ÷संस्थालाई सम्पत्ति शुद्धीकरण निवारणको विषयमा सचेत गराउने उद्देश्यले नियमित तालिम संचालन गर्दै आएको छ । सहकारी विभागको सहयोगमा आर्थिक बर्ष २०७६/०७७ मा १० वटा तालिम संचालन गर्ने योजना रहेको महासंघका महाप्रबन्धक चित्राकुमारी थाम्सुहाङ सुब्बाले बताउनुभयो । ‘कानुन लागु भएपछि हामीले थाहा पाएनौं भन्न मिल्दैन । त्यसैले त्यस विषयमा जानकारी लिएर नियमसंगत काम गर्नुपर्ने हुन्छ,’ उहाँले भन्नुभयो । उहाँले सहकारी संघ/संस्थाले तालिमलाई महत्व दिएर संचालक समिति, लेखा सुपरिवेक्षण समिति, सदस्य तथा कर्मचारीका लागि नियमित रुपमा तालिम तथा शिक्षा दिने व्यवस्था गर्नुपर्नेमा जोड दिनुभयो ।
कार्यक्रममा सहभागी हुनुभएको अर्थजगत साकोसकी संचालक शुसिला नेपालले तालिम उपलब्धीमुलक रहेको बताउँदै भन्नुभयो,‘हामीले यो तालिमबाट महत्वपूर्ण कुरा सिक्यौं । कतिपय कुरा अभ्यास समेत गर्नुपर्ने देखिन्छ । ग्रुप वर्क गर्न पाएको भए अझ आत्मविश्वास बलियो हुने थियो ।’ उहाँले राज्यलाई सहयोग पु¥याउन सक्ने आशा लिएको बताउनुभयो । त्यसैगरी गान्वा सुनुवारले नियमित रुपमा तालिम लिनुपर्ने र यस विषयमा धेरै जानकारी प्राप्त भएको बताउनुभयो ।
तालिममा नेपाल राष्ट्र बैंकका उपनिर्देशक हरि नेपाल, उपरजिष्ट्रार लम्साल, राष्ट्र बैंकका पूर्व निर्देशक श्यामकृष्ण दाहाल, रामसूदन तिमल्सिनाले प्रशिक्षण दिनुभएको थियो । सो तालिममा काठमाडौं, ललितपुर, भक्तपुर, काभ्रेलगायतका सहकारी संघ÷संस्थाका ६० जना जतिको सहभागिता रहेको कार्यक्रम अधिकृत अमित अधिकारीले बताउनुभयो ।
